Saltar ao contido

GO!GO!ZO!

O festival Go!Go!Zo! Xacobeo 21-22 regresa co certame XeneraSon Rock e unha ampla programación estival

XeneraSonRockGoGoZo

O festival Go!Go!Zo! Xacobeo 21-22 regresa ao Monte do Gozo cunha segunda edición chea de novidades. Unha das principais é a celebración do certames XeneraSon Rock e XeneraSon Folk. En ambos os dous casos, as inscricións atópanse abertas.

“Queremos dar un chanzo máis na promoción do talento do país coa celebración destes dous certames”, indican desde a organización de Go!Go!Zo! Xacobeo 21-22. No caso do XeneraSon Rock, “andamos á procura das mellores bandas noveis pertencentes a academias de música tanto de Galicia como de Portugal. Tanto se aínda están na academia ou se están a comezar a súa andaina no eido musical, poderán participar. O obxectivo desta proposta é poñer en valor ás futuras promesas da música ofrecéndolles un escenario profesional e unha ampla equipa para que as actuacións sexan o máis próximas á realidade dun festival”.

Para participar no XeneraSon Rock, cómpre ir á sección de reservas da web. O prezo por persoa inscrita é de 25 €. As bandas que se anoten deberán concretar o nome, o número de integrantes e os instrumentos que tocan para poder facilitar os cambios de escenario. O prazo para anotarse finaliza o vindeiro 15 de xuño.

O certame XeneraSon Rock desenvolverase en dúas fases: as semifinais (a desenvolver os días 1, 2 e 3 de xullo) e a final (que terá lugar o 30 de xullo). Un xurado profesional será o encargado de valorar as actuacións pasando á última fase 6 bandas. Desas seis, dúas serán as gañadoras e, como premio, poderán gravar un LP nun estudo profesional e actuar no festival Revenidas e nos Atardeceres no Gaiás.

Agrupacións tradicionais, en agosto

Pola súa banda, o XeneraSon Folk, que vén de abrir as súas inscricións -tamén a través da web-, ofrecerá unha contorna única á disposición das agrupacións de música e baile tradicional de Galicia. Este certame tamén se desenvolverá en dúas fases: semifinais -os días 12, 13 e 14 de agosto– e a final -o 20 de agosto-.

O xurado estará composto por 3 persoeiros ligados ao folk e á música tradicional galega e terán en conta nas súas valoracións a execución, dificultade e roupa das agrupacións. As dúas vencedoras obterán un premio en metálico e poderán actuar nun prestixioso programa de televisión.

Campamentos formativos

A programación da segunda edición de Go!Go!Zo! Xacobeo 21-22 contará tamén cunha sección específica dedicada á formación. Neste senso, estableceranse tres propostas de campamentos formativos: Produción musical (no mes de xullo), Produción audiovisual e Webcomic (estes dous últimos, en setembro). Toda a información e os prezos atópanse na web do festival.

Trátase de propostas que se desenvolverán durante 5 días e que permitirán ás persoas participantes adquirir as competencias precisas para realizar unha sesión musical, para crear unha peza audiovisual ou para pendurar en liña o seu propio cómic.

Ampla programación estival

As devanditas propostas complementaranse cunha ampla programación estival. Nela non faltarán as sesións musicais, contando con arredor dunha ducia de picadiscos que ofrecerán os máis variados estilos.

Tamén se repite a sección específica para crianzas, Catividades que, ademais de contar coas tardes de actividades dos mércores de xullo e agosto, ofrecerá dúas propostas moi especiais. Trátase de dúas festas de inchables acuáticos, que se desenvolverán tanto entre os días 29 de xuño e o 2 de xullo como entre as xornadas do 5 ao 8 de setembro.

E a maiores, crearase outra sección dedicada ás persoas amantes do reggae. A través do ciclo GoZo Station, achegarase ao público ás orixes da cultura xamaicana co Soundsystem, artistas reggae de primeiro nivel e outras propostas culturais. Esta sección do festival Go!Go!Zo! Xacobeo 21-22 levarase a cabo os días 23 de xuño, 15 de xullo e 27 de agosto.

A programación completarase con macroactuacións rock e folk, exhibicións e masterclasses de zumba, veladas de combos musicais e outras sorpresas.

Deixa unha resposta

O teu enderezo electrónico non se publicará

X